បន្ទាប់ពីក្រុមកាំភ្លើងធំ Arsenal បង្ហាញពីភាពខ្លាំងរបស់ខ្លួនកាលពីយប់មិញដោយយកឈ្នះក្រុមមាន់ខ្នាយមាស Tottenham Hotspur នៅទឹកដីស្ពើរួចមក គ្រូបង្វឹករបស់ក្រុម Spur លោក Antonio Conte បាននិយាយក្តែងៗថា៖ លោកបានមើលឃើញពីកម្រិតលេងរបស់ក្រុម Arsenal ពេលនេះគឺថាពួកគេមានសមត្ថភាពគ្រប់គ្រាន់ក្នុងការប្រជែងពានរង្វាន់លីកកំពូលអង់គ្លេស English Premier League ។ មិនត្រឹមតែប៉ុណ្ណោះលោក Conte បានបន្ថែមថានៅពេលនេះមានតែក្រុមពីរទេដែលអាចប្រជែងគ្នាឈ្នះពាននោះគឺកាំភ្លើងធំ Arsenal និងមេឃខៀវ Manchester City ។ ដោយឡែកអតីកីឡាករខ្សែការពាររបស់ក្រុមបិសាចក្រហម Manchester United លោក Gary Neville វិញបាននិយាយថា៖ ក្រុមកាំភ្លើងធំ Arsenal មិនអាចឈ្នះពាន Premier League បាននោះទេ។ ពោលគឺក្រុមមេឃខៀវ Manchester City ទៅវិញទេដែលនឹងក្លាយជាជើងឯក ហើយក្រុមបិសាចក្រហម Manchester United ជាក្រុមឈរនៅចំណាត់ថ្នាក់លេខ២ ហើយក្រុម Arsenal ឈរនៅតំណែងលេខ៣នៅរដូវកាលនេះ។ បច្ចុប្បន្នលីកកំពូលអង់គ្លេស Premier League គឺ Arsenal ឈរនៅចំណាត់ថ្នាក់លេខ១ មាន៤៧ពិន្ទុ ដាច់ពីក្រុមលេខ២ Manchester City មាន៣៩ពិន្ទុ លេខ៣ Newcastle United មាន៣៨ពិន្ទុ និងលេខ៤ Manchester United មាន៣៨ពិន្ទុ៕