លោកស្រីម៉ារីយ៉ា ប៉ូទ្បែត តារាចម្រៀងផ្នែកស្ត្រីមុនគេបង្អស់នៃកម្ពុជាបានទទួលមរណភាពហើយ កាលពីព្រឹកថ្ងៃទី០៤ ខែមករា ឆ្នាំ២០២៣ក្នុងជន្មាយុ៨៨ឆ្នាំ នារាជធានីភ្នំពេញ ដោយជរាពាធ។ នេះបើតាមការបញ្ជាក់តាមរយៈហ្វេស ប៊ុកផ្លូវការរបស់ក្រុមព្រះសុរិយានៅថ្ងៃទី៥ ខែមករា។ បើតាមក្រុមព្រះសុរិយាបានបញ្ជាក់បន្ថែមនៅក្នុងហ្វេស ប៊ុករបស់ខ្លួនថា លោកស្រីម៉ារីយ៉ា ប៉ូទ្បែត មាននាមក្នុងសិល្បៈថា សាវត្តី គឺជាអ្នកចម្រៀងសម័យផ្នែកស្រ្តីមុនដំបូងគេបង្អស់ក្នុងប្រទេសកម្ពុជាដែលល្បីល្បាញតាំងពីដើមទស្សវត្សរ៍១៩៥០មកម្ល៉េះ គឺមុនលោកស្រី កែវ សេដ្ឋា ទៅទៀត និងនៅខណៈពេលដែលសិល្បករ សិល្បការិនីផ្នែកចម្រៀងជាច្រើនក្នុងសម័យយុគមាសនៅសេសសល់តិចតួចបំផុត។

សូមជម្រាបថាលោកស្រីម៉ារីយ៉ា ប៉ូទ្បែតជាម្ចាស់បទចម្រៀងល្បីៗជាច្រើនដូចជា៖ បទវីយូទ្បុងស្នេហា,ចុងស្រល់, សំបុត្រក្រោមខ្នើយ, កូលាបមួយទង, រំលាយតណ្ហា, មេឃមីស្រទំ និងបទរ៉ៃយំជាដើម...៕